Q: Main university mein naya-naya aya hun. Class mein professor aate hain toh main dar jata hun ki mujhse kuch puch na den. Jabki main apne school ka second topper hun. Mujhe mahsoon hota hai ki unke sawalon ka jo jawab dusre students dete hain, main unse behtar de sakta hun lekin mai ye sochkar dar jata hun ki jawab na de saka to. Mujhe kya karna chahiye jisse mera confidence badhe.
 Pritam Soni, Bareilly
A: Apne professors ko waise hi samajhiye jaise aapke ghar ke koi senior sadasya. Dar ko prem se jeeta ja sakta hai. Kyonki aap apne subject ko jaante hain to isase pehle ki professor aap se prashn poochhe aap haath khada kar ke ulta unse pehle prashn poochh leejiye jiska answer aap genuinely chahte hon. isase aap ki hichkichahat khatm ho jayegi.   


Q: Mai apne roj ke kam me kya kuchh naya kar sakta hun jisse mai khud ko jyada spiritual feel karoon. Reading meri hobby hai kya kuchh achchhe books suggest kar sakte hai?
Apurv Srivastava, Gorakhpur
A: Bhagwad Gita aur Ashtavakra Gita spirituality ki bahut achhi books hain. Apni aise saare positive kaam yaad kariye jinko karne ke baad aap ke aur aas paas ke logon ke life mein jyada anand, shanti, aur utsah mila aur negative baatein bhi pehchaaniye jinse ve kam hui. Saare positive baaton ko badhana aur negative baaton ko chhodna spirituality hai. Meditation se aapko help milegi.  


Q: Mai jyadatar samay akela rahna pasand karti hun, mujhe achchha bhi lagta hai. koi bevajah milna chahe to mai irritate ho jati hun. Kai log kahte hain ki mai ajeeb kism ki hun, Kya mai vakai abnormal hun, agar han to mujhe karna chahiye.
Sruti Singh, Merrut
A: Seva karne se aap ki yeh problem theek ho jayegi. Aap doosron ki jitna adhik madad karengi utna hi aap ko bhi achha lagega. Gareeb bacchon ko padhane se aap start kar sakti hain.